बारा । बारा प्रहरीले ठूलो परिमाणमा लागु औषध चरेससहित एकजनालाइ पक्राउ गरेको छ ।
जिल्लाको जीतपुर सिमरा उप-महानगरपालिका वडा नम्बर- २१ स्थितबाट ११.६८ किलो लागुऔषध चरेससहित एकजनालाइ पक्राउ गरेको हो ।
प्रहरीको टोलीले मोटरसाइकल र लागुऔषध चरेससहित मकवानपुर, थाहा नगरपालिका–६ का ३८ वर्षीय दशरथ थिङलाई नियन्त्रणमा लिएको हो ।
इलाका प्रहरी कार्यालय अमलेखगञ्जबाट प्रहरी नायब निरीक्षक टेक बहादुर कार्कीको कमाण्डमा खटिएको टोलीले विशेष सूचनाका आधारमा जाँच गर्दा मोटरसाइकलबाट ठूलो परिमाणमा चरेस बरामद भएको बारा प्रहरीको दाबी छ ।
हेटौंडाबाट वीरगन्जतर्फ आउँदै गरेको बा ४८ प ९३३ नम्बरको १५० सिसीको पल्सर मोटरसाइकललाई रोकेर जाँच गर्दा सिटमुनी लुकाइछिपाइ राखिएको अवस्थामा चरेस जस्तो देखिने पदार्थ फेला परेको प्रहरीले जनाएको छ ।
तराजुमा तौल गर्दा प्लास्टिक सहित उक्त लागुऔषधको तौल ११.६८ किलो रहेको पुष्टि भएको छ।
पक्राउ परेका थिङलाई नियन्त्रणमा लिई आवश्यक कानुनी प्रक्रिया अघि बढाइएको बारा प्रहरीले जानकारी दिएको छ।
