काठमाडौं । पूर्वयुवराज पारस शाहको स्वास्थ्य अवस्थामा सुधार आएको छ ।
हृदयाघातपछि राजधानीको थापाथलीस्थित नर्भिक अस्पतालमा उपचाररत पूर्वयुवराज शाहको स्वास्थ्यमा सुधार आएको जनाइएको छ ।
अस्पतालका प्रवक्ता अजय मिश्राले पारस शाहको स्वास्थ्यमा सुधार भएको पुष्टि गरे । सुधार आएको कारण उनलाई मंगलबारदेखि वार्डमा सारिएको उनले बताए ।
उनले भने, ‘उहाँको अवस्था निकै सुधार भएको छ, अहिले प्राइभेट वार्डमा सारिएको छ ।’
पटकपटक हृदयाघात दोहोरिएकाले चिकित्सकको विशेष निगरानीमा केही दिन उनको अस्पतालमै राखेर उपचार गरिने बताइएको छ ।
नर्भिक अस्पतालमा डाक्टर यादव भट्ट नेतृत्वको टोलीले पारसको उपचार गरिरहेको छ ।
आइतबार राति हृदयाघात भएपछि शाहलाई सहयोगीले नर्भिक लगेका थिए, त्यसलगत्तै उनको मुटुमा स्टेन राखिएको थियो । त्यसयता आईसीयूमा राखेर उपचाररत उनलाई मंगलबार भने वार्डमा सारिएको हो ।
