काठमाडौं । राजधानी काठमाडौंमा खानेपानीको पाइप फुट्दा लाखौं लिटर पानी खेर गएको छ ।
देशको राजधानी काठमाडौंमा दुइपटक खानेपानीको पाइप फुट्दा करिब १५ लाख लिटर पानी खेर गएको जनाइएको छ ।
गएको २० दिनमा काठमाडौंका दुइ ठाउँमा गरी दुइपटक खानेपानी पाइप फुटेको काठमाडौं उपत्यका खानेपानी लिमिटेड (केयुकेएल) ले जनाएको छ ।
राजधानीको थापाथली चोक र बबरमहलमा मेलम्चीको पानी वितरण गरिएको पाइप फुटेको केयुकेएलले जानकारी दिएको छ ।
यी दुइवटै ठाउँमा पाइप फुट्दा करिब १५ लाख लिटर पानी खेर गएको केयुकेएलको आँकडा छ ।
केयुकेएलका अनुसार आज (मंगलबारं विहान थापाथली चोकमा खानेपानीको पाइप फुट्दा ५ लाख लिटर र गएको ३० माघमा बबरमहलमा पाइप फुट्दा १० लाख लिटर पानी खेर गएको थियो ।
थापाथली चोक नजिकको फुटेको पाइप भने केही समयमै बन्द गर्न सफल भएकोले धेरै पानी खेर नगएको केयुकेएलले जानकारी दिएको छ ।
केयुकेएलका अनुसार बिहानै ५ बजे पाइप फुटेपछि त्यस क्षेत्रका केही पसलहरु डुबानमा परेका थिए । पाइप फ्ट्दा सडक र सडक पेटमा क्षति पुगेको थियो । सडकमा ढुंगा–माटो र गिट्टी थुप्रिएको थियो ।
तर अहिले ती प्रभावित क्षेत्रमा मर्मत तथा सरसफाइको कार्य भइसकेको बताइन्छ ।
पाइप लाइन किन फुट्यो भन्ने पत्ता लागिनसकेको जनाइएको छ । यद्यपी, कालोपत्रे सडक नै फुटाएर पानी बाहिर आएकोले पानीको चापका कारण फुटेको अनुमान गरिएको छ ।
