काठमाण्डौँ । आकर्षक तलब देखाएर बैदेशिक रोजगारीमा पठाइदिन्छु भन्दै ठगेको आरोपमा दुइ जनालाई प्रहरीले पक्राउ गरेको छ । क्रोएसिया र साइप्रस पठाइदिन्छु भन्दै ठगेको आरोपमा दुई जनालाई प्रहरीले पक्राउ गरेको हो ।
पक्राउ पर्नेमा बाराको पचरौता नगरपालिका–८ घर भई काठमाण्डौँ भिमसेनगोला बस्ने सञ्जय साह बानियाँ र उदयपुर रौतामाई गाउँपालिका वडा नम्बर ३ घर भई काठमाडौं गोकर्णेश्वर–८ बस्ने यादबहादुर बुर्जामगर रहेका प्रहरीले जनाएको छ ।
मगरले क्रोएसिया पठाइदिन्छु भन्दै २ जना पीडितसँग ५ लाख ७५ हजार रूपैयाँ र सञ्जयले साइप्रस पठाइदिन्छु भन्दै १ जनासँग ४ लाख ६० हजार रूपैयाँ लिएर सम्पर्कविहीन भएका प्रहरीको भनाइ छ ।
पीडितहरूले दिएको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले मगरलाई काठमाडौं गोकर्णेश्वर–८ बाट तथा सञ्जयलाई टेकुबाट पक्राउ गरेको हो ।
उनीहरूलाई आवश्यक कारवाहीका लागि वैदेशिक रोजगार विभाग ताहाचल पठाइएको प्रहरीले जानकारी दिएको छ ।
