काठमाडौं । नेपालमा हाल पश्चिमी न्यून चापीय प्रणाली र स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ।
यसको असरले कर्णाली प्रदेश, गण्डकी प्रदेश र सुदूरपश्चिम प्रदेशका पहाडी तथा हिमाली भूभागमा मुख्यतया बादल लागेको छ।
कोशी र लुम्बिनी प्रदेशसहित बागमती प्रदेशको पहाडी–हिमाली भूभागमा आंशिक रूपमा बादल देखिएको छ भने बाँकी क्षेत्रको मौसम सामान्यतया सफा छ।
दिउँसोको स्थिति
आज दिउँसो हिमाली भूभागमा साधारणतया बादल लागेको रहन सक्छ।
तराई र पहाडी भूभागमा आंशिक बादल रहनेछ।
विशेषगरी कोशी, गण्डकी र कर्णाली प्रदेशका केही हिमाली क्षेत्रमा चट्याङ्गसहित हल्का वर्षा र हिमपातको सम्भावना रहेको छ।
रात्रीको स्थिति
आज राति लुम्बिनी, कर्णाली र सुदूरपश्चिमका पहाडी–हिमाली भूभागमा मुख्यतया बादल रहनेछ।
गण्डकी प्रदेशको तराई, साथै बागमती र कोशी प्रदेशका पहाडी–हिमाली भूभागमा आंशिक बादल रहने अनुमान गरिएको छ।
सुदूरपश्चिम प्रदेशका केही पहाडी र हिमाली क्षेत्रहरूमा चट्याङ्गसहित मध्यम वर्षा पर्न सक्ने सम्भावना छ।
त्यस्तै, कोशी प्रदेशका पहाडी–हिमाली भूभाग तथा गण्डकी र कर्णालीका एक–दुई हिमाली स्थानमा हल्का वर्षा र हिमपात हुन सक्ने मौसम पूर्वानुमान महाशाखाले जनाएको छ।
