वीरगन्ज । पछिल्ला केही दिनदेखि गुगलको फोन एप (डायलर) को इन्टरफेस अचानक परिवर्तन हुँदा धेरै एन्ड्रोइड प्रयोगकर्ताहरू अचम्ममा परेका छन्।
कुनै पनि एप अपडेट वा अनुमति बिना नै सर्भर–साइड एक्टिभेसनमार्फत यो परिवर्तन भएको हो। इन्टरनेटमा जोडिने बित्तिकै पुरानो डिजाइन नयाँ रूपमा देखिएपछि प्रयोगकर्ताहरूले सामाजिक सञ्जालमा असन्तुष्टि पोखेका छन्।
गुगलले फोन एपको सम्पूर्ण लेआउट परिवर्तन गरेको छ। अब कल लगमा प्रत्येक कल छुट्टाछुट्टै देखिन्छ र पुराना समूहहरू हटाइएका छन्। कल इतिहास र मनपर्ने सम्पर्कहरूलाई ‘होम’ ट्याबमा समायोजन गरिएको छ। कलहरू गोलाकार किनारा भएका कार्डहरूमा देखिन्छन् र मिस्ड कल, स्पाम तथा सम्पर्कहरूलाई सजिलै छुट्याउन सकिने फिल्टर प्रणाली पनि थपिएको छ।
कल प्राप्त गर्ने र विच्छेद गर्ने बटनहरू पनि ठूला र गोलाकार बनाइएका छन्। यसका साथै नयाँ जेस्चर प्रणाली पनि थपिएको छ, जसको माध्यमबाट प्रयोगकर्ताहरूले कल उठाउन वा काट्नका लागि स्वाइप वा ट्याप दुवै विकल्प प्रयोग गर्न सक्छन्।
रेडिट र ‘एक्स’ (पहिले ट्विटर) जस्ता सामाजिक सञ्जालमा धेरै प्रयोगकर्ताहरूले यो परिवर्तनलाई अनावश्यक र भ्रामक भनेका छन्। उनीहरूका अनुसार यो नयाँ डिजाइन प्रयोग गर्न कठिन छ। यद्यपि, केही प्रयोगकर्ताले भने नयाँ डिजाइनलाई सफा र आधुनिक भन्दै यसको प्रशंसा गरेका छन्।
यस विषयमा गुगलले यो परिवर्तन १८,००० भन्दा बढी प्रयोगकर्ताहरूमा गरिएको अनुसन्धानमा आधारित भएको स्पष्ट पारेको छ। कम्पनीका अनुसार, नयाँ ‘मटेरियल ३ एक्सप्रेसिभ डिजाइन’ले प्रयोगकर्ताहरूलाई महत्त्वपूर्ण बटन र जानकारीहरू छिटो पहिचान गर्न मद्दत गर्छ। गुगलले चाँडै नै म्यासेज, कन्ट्याक्ट, जीमेल र फोटो जस्ता अन्य एपहरूमा पनि यस्तै परिवर्तन ल्याइने बताएको छ।
हाल यो नयाँ इन्टरफेस प्राप्त गर्न गुगल फोन एपको संस्करण १८६ आवश्यक पर्छ। यद्यपि, यो परिवर्तनपछि पुरानो डिजाइनमा फर्कने कुनै विकल्प उपलब्ध छैन।
