रौतहट । गौर नगरपालिका–६ सबगढाका शेष महताब आलमसँग अनलाइन प्रेम र विवाहपछि नेपाल आएकी बंगलादेशी युवती लाबनी बेगम यतिखेर अलपत्र परेकी छिन्।
सामाजिक सञ्जालमार्फत करिब तीन वर्षसम्मको प्रेम सम्बन्धपछि उनले आलमसँग ‘कोर्ट म्यारिज’ गरेकी थिइन्। जेठ २८ गते नेपाल आएकी लाबनीलाई विवाहको दुई सातामै घरबाट निकालिएको उनको आरोप छ। यो घटनापछि उनी बंगलादेश फर्किइन्, तर श्रीमान् आलमकै बोलावटमा साउन १५ गते पुनः नेपाल आइन्। दुखको कुरा, यसपटक पनि उनको श्रीमान्को परिवारले उनलाई घरमा बस्न दिएन।
अहिले उनी छिमेकीको घरमा आश्रय लिएर बस्न बाध्य छिन्। लाबनीले न्यायका लागि प्रहरीलगायत विभिन्न निकायमा गुहार मागेकी छिन्। तर, जिल्ला प्रहरी कार्यालय, रौतहटका डीएसपी दीपक रायले कानूनी रूपमा लाबनी स्वेच्छाले नेपाल आएको भन्दै यसलाई अन्याय मान्न नसकिने बताएका छन्। यस अवस्थामा, वडाध्यक्ष अवध बिहारीप्रसाद ले भने, ‘कानूनी रूपमा विवाह गरेर आएकी महिलालाई वैवाहिक अधिकार दिनुपर्छ।’
हाल आलमको घरमा ताला लागेको छ र उनीसहित परिवारका सदस्यहरू सम्पर्कविहीन छन्। लाबनीको भविष्य के हुने हो, यो विषयले थप जटिलता उत्पन्न गरेको छ।
