धनुषा । आज बिहान भएको मोटरसाइकल दुर्घटनामा एक जनाको घटनास्थलमै ज्यान गएको छ भने दुई जना गम्भीर घाइते भएका छन्।
धनुषाको कमला नगरपालिका र विदेह नगरपालिकाको सिमानामा पर्ने मुडिया सराबे नजिकै हुलाकी राजमार्गमा बिहान करिब ३ बजेतिर यो दुर्घटना भएको प्रहरीले जनाएको छ।
दुर्घटनामा परेको अनटेस्ट नम्बर प्लेट भएको मोटरसाइकलमा तीन जना सवार थिए। उनीहरू जन्तीबाट फर्किँदै गरेको बुझिएको छ। मृतक धनुषाको शहीदनगर नगरपालिका–८ बिसरभोरा निवासी एक युवक हुन्। सोही वडाको नाथपट्टी टोलका अन्य दुई युवक गम्भीर घाइते भएका छन्। उनीहरूको नाम भने प्रहरीले खुलाएको छैन।
प्रहरीको प्रारम्भिक अनुमान अनुसार तीव्र गति र मादकपदार्थ सेवनका कारण दुर्घटना भएको हो। बिहान मर्निङ वाकमा निस्किएका स्थानीयले सडकछेउमा दुर्घटनाग्रस्त मोटरसाइकल र घाइतेहरूलाई देखेपछि प्रहरीलाई खबर गरेका थिए। घटनास्थलमा पुगेको प्रहरी टोलीले घाइतेहरूलाई तत्काल जनकपुरस्थित प्रादेशिक अस्पताल पठाएको थियो। अस्पताल पुर्याएपछि चिकित्सकले एक जनालाई मृत घोषणा गरेका थिए।
धनुषा प्रहरीले घटनाबारे थप अनुसन्धान भइरहेको जनाएको छ।
