वीरगन्ज । लागूऔषध बेचबिखनको आरोपमा एक युवतीलाई काठमाडौंबाट पक्राउ गरिएको छ, जसले मधेश प्रदेशबाट राजधानीसम्म लागूऔषधको सञ्जाल फैलिएको हुन सक्ने चिन्ता बढाएको छ।
पक्राउ पर्नेमा जनकपुर घर भइ हाल काठमाडौं–१५ बस्ने २० वर्षीया मनिषा ठाकुर छिन्। उनलाई जिल्ला प्रहरी परिसर काठमाडौंको विशेष टोलीले पक्राउ गरेको हो। प्रहरीले लागूऔषध बेचबिखन भइरहेको गोप्य सूचनाका आधारमा मनिषा ठाकुरको कोठामा खानतलासी गरेको थियो। सो क्रममा प्रहरीले ठूलो परिमाणमा प्रतिबन्धित औषधिजन्य लागूऔषधहरू बरामद गरेको छ।
बरामद गरिएका सामग्रीहरूमा २१ हजार ५ सय ट्याब्लेट ट्रमाडोल, २६० पिस फेनारगन, २६० पिस डाइजापाम र २६० पिस नुर्फिन रहेका छन्। यसका साथै, ठाकुरको कोठाबाट २ लाख २५ हजार ८ सय रुपैयाँ नगद समेत बरामद भएको प्रहरीले जनाएको छ।
पक्राउ परेकी ठाकुरविरुद्ध लागूऔषध कसुरमा काठमाडौं जिल्ला अदालतबाट ७ दिनको म्याद थप गरी अनुसन्धान अगाडि बढाइएको छ। जनकपुर घर भएकी एक युवा युवती राजधानीमा यति ठूलो परिमाणमा लागूऔषधसहित पक्राउ पर्नुले मधेश प्रदेशबाट हुने लागूऔषधको ओसारपसार र यसमा युवाहरूको संलग्नताबारे गम्भीर प्रश्नहरू खडा गरेको छ। प्रहरीले यस सञ्जालको थप गहिराइमा पुग्न अनुसन्धानलाई तीव्रता दिएको बताएको छ।
