वीरगन्ज । मधेश प्रदेश सरकारले आगामी आर्थिक वर्ष २०८२/८३ को नीति तथा कार्यक्रममार्फत प्रदेशको पर्यटन क्षेत्रलाई नयाँ दिशा दिने महत्त्वाकांक्षी योजना सार्वजनिक गरेको छ।
प्रदेश प्रमुख सुमित्रा सुवेदी भण्डारीले प्रदेश सभामा प्रस्तुत गरेको कार्यक्रममा ‘घुमौं मधेश, बुझौं मधेश’ भन्ने आकर्षक नाराका साथ ‘मधेश भ्रमण वर्ष २०८३’ सञ्चालन गर्ने घोषणा गरिएको छ। यस अभियानको मुख्य उद्देश्य प्रदेशभित्रका पर्यटकीय स्थलहरूको प्रवर्द्धन गरी आन्तरिक तथा बाह्य पर्यटकहरूलाई आकर्षित गर्नु रहेको छ।
मधेश प्रदेश प्राकृतिक सौन्दर्य, धार्मिक स्थलहरू र ऐतिहासिक महत्वका धरोहरहरूले भरिपूर्ण छ। यस भ्रमण वर्षमार्फत प्रदेश सरकारले यिनै सम्पदाहरूको उचित प्रचारप्रसार गर्दै पर्यटकहरूको बसाइ लम्ब्याउनुका साथै पर्यटनसँग सम्बन्धित व्यवसायलाई सुदृढ बनाउने लक्ष्य लिएको छ। यसले स्थानीय रोजगारी सिर्जनामा समेत महत्त्वपूर्ण भूमिका खेल्ने विश्वास गरिएको छ।
विशेषगरी, पौराणिक नगरी जनकपुरधामलाई राष्ट्रिय तथा अन्तर्राष्ट्रिय विवाह केन्द्रका रूपमा विकास गर्ने परिकल्पनालाई यस नीति तथा कार्यक्रमले विशेष प्राथमिकता दिएको छ। भगवान राम र सीताको विवाह भएको यस पवित्र भूमिले वैवाहिक संस्कार र धार्मिक पर्यटनका लागि विश्वभरका मानिसहरूलाई आकर्षित गर्न सक्ने प्रबल सम्भावना छ। सरकारले विवाह पर्यटनलाई प्रवर्द्धन गर्न आवश्यक पूर्वाधार विकास, सेवा विस्तार र अन्तर्राष्ट्रिय स्तरमा प्रचारप्रसारका कार्यक्रमहरू सञ्चालन गर्ने योजना बनाएको छ।
पर्यटन क्षेत्रको विकासका लागि पूर्वाधार निर्माण, पर्यटक सुरक्षा, सूचना प्रविधिमा आधारित सेवा प्रवाह र स्थानीय संस्कृतिको संरक्षणमा समेत जोड दिइनेछ। मधेश भ्रमण वर्ष २०८३ को सफल कार्यान्वयनले प्रदेशको आर्थिक समृद्धिमा महत्त्वपूर्ण टेवा पुर्याउने र मधेशलाई देशकै प्रमुख पर्यटकीय गन्तव्यका रूपमा स्थापित गर्ने अपेक्षा गरिएको छ।
