जनकपुर । मधेस प्रदेशका मुख्यमन्त्री सतिशकुमार सिंहले सङ्घीय शासन प्रणालीलाई प्रभावकारी बनाउन प्रदेशमा प्रहरी तथा कर्मचारी समायोजनको कार्य शीघ्र सम्पन्न गर्नु आवश्यक रहेको बताएका छन्।
जनकपुरधाममा आयोजित “सङ्घीयता सुदृढीकरणसम्बन्धी अन्तरक्रिया कार्यक्रम”मा मुख्यमन्त्री सिंहले कर्मचारीको प्रभावकारी समायोजन नहुँदा प्रदेश सरकारको विकास प्रयासमा अवरोध भएको स्पष्ट पारे ।
विकास बजेट खर्चमा कर्मचारी अभावको असर
मुख्यमन्त्री सिंहका अनुसार कर्मचारीको पर्याप्त सहयोग नहुँदा प्रदेशको विकास बजेट सोचेअनुसार खर्च हुन सकेको छैन।
“समायोजन भएका कर्मचारीहरूको संख्यागत र कार्यगत उपस्थिति कमजोर छ,” उनले भने, “विकासको गतिमा असर परेको छ।”
सिंहले ११ औँ तहका अधिकृतलाई सचिवमा पदोन्नति गर्नुपर्ने र पालिकामा खटाइने प्रमुख प्रशासकीय अधिकृतहरू प्रदेश सरकारकै मातहतमा पठाइनुपर्ने धारणा राखे ।
मुख्यमन्त्री सिंहले अघिल्लो प्रधानमन्त्री केपी शर्मा ओलीले सबै सचिवहरूलाई मुख्यमन्त्री कार्यालयमार्फत पठाएको उदाहरण दिँदै, “मधेसका पालिकामा खटाइने प्रमुख प्रशासकीय अधिकृतहरू पनि मुख्यमन्त्रीको सिफारिसमा खटाइनुपर्छ,” भने।
उक्त व्यवस्था कार्यान्वयन भएमा विकास योजनाको कार्यान्वयन सजिलो हुने र प्रदेशको नेतृत्वले सघन अनुगमन गर्न सक्ने उनको विश्वास छ।
मल र बीउको अभाव, जनसंख्याका आधारमा बजेट माग
कार्यक्रममा मुख्यमन्त्री सिंहले मधेस प्रदेशमा कृषि उत्पादनका लागि आवश्यक पर्ने रासायनिक मल तथा बीउ पर्याप्त मात्रामा नपुगेको गुनासो पनि गरे। उनले प्रदेशको जनसंख्याका आधारमा मलको कोटा र बजेट बाँडफाँट हुनुपर्ने माग गरे।
“हामीकहाँ उत्पादन गर्ने इच्छा, योजना र सम्भावना छ,” सिंहले भने, “तर मल र बीउ नहुँदा किसान निराश छन्। यसले खाद्य सुरक्षामा नै संकट ल्याउन सक्छ।”
मुख्यमन्त्री सिंहले समापनमा भनाइ राख्दै संघीयतालाई संस्थागत गर्न सबै तहका सरकार, कर्मचारी र सरोकारवालाबीच समन्वय र स्पष्ट भूमिकाको खाँचो रहेको औंल्याए।
