वीरगन्ज । रौतहटबाट काठमाण्डौँ जाँदै गरेको सुमो दुर्घटनामा परेको छ ।
गौरदेखि काठमाण्डौँका लागि छुटेको ना १ ज ५४८५ नम्बरको सुमो बुधबार दिउँसो दुर्घटनामा परेको हो ।
सुमोको ब्रेक फेल भएर अनियन्त्रित हुँदा मकवानपुरको ईन्द्रसरोवर गाउँपालिका वडा नम्बर २ बतासे स्थित भीमफेदी कुलेखानी सिस्नेरी काठमाण्डौ सडकखण्डमा दुर्घटना भएको प्रहरीले जनाएको छ ।
प्रहरीका अनुसार सुमो अनियन्त्रित भई सडकभन्दा १०० मिटर तल खोल्सामा खसेको हो ।
दुर्घटनामा सुमोमा सवार दशमध्ये ९ जना घाइते भएका छन् । दुर्घटनाबाट तीन जना गम्भीर, एक मध्यम तथा ५ जना सामान्य घाइते बनेका प्रहरीले जनायो ।
घाइतेहरुलाई उपचारका लागि काठमाण्डौँ पठाइएको छ । चालक प्रहरीको सम्पर्कमा रहेको तथा यसबारे आवश्यक अनुसन्धान भइहेको मकवानपुर प्रहरीले जानकारी दिएको छ ।
