वीरगन्ज । नेशनल इन्फोटेक कप २०८१ को उपाधी ग्लोबल बिजनेश कलेजले उचालेको छ । वीरगन्जमा बिहिबार सम्पन्न फाइनल खेलमा ज्ञानदा माविलाई पछि पार्दै ग्लोबलले उपाधी जितेको हो ।
नारायणी स्टेडियममा भएको खेलमा ग्लोबलले ज्ञानदालाई ७ रनले हराएको हो । टस हारेर पहिले ब्याटिङ गरेको ग्लोबलले निर्धारित २० ओभरमा ७ विकेट गुमाएर ८८ रन बनाएको थियो ।
उसका लागि आदर्श भण्डारीले सर्वाधिक ४३ रन बनाए । यस्तै सुभव बरालले ११ रन जोडे ।
जवाफी ब्याटिङ गरेको ज्ञानदा पूरै ओभर खेलेर ९ विकेटको क्षतिमा ८१ रनमै समेटियो । ज्ञानदाका लागि गुड्डु यादव १५ र मुन्ना यादवले १४ रनको योग दिए ।
फाइनल खेलमा आदर्श भण्डारी प्लेयर अफ दि म्याच घोषित भएका छन् ।
