वीरगन्ज । पर्सा प्रहरीले हुण्डीको रकमसहित एक जना भारतीय नागरिकलाइ पक्राउ गरेको छ ।
विशेष सूचनाको आधारमा प्रहरीले वीरगन्ज-१० आदर्शनगरबाट एक जना भारतीय नागरिकलाइ पक्राउ गरेको हो । पक्राउ पर्नेमा भारत विहार पूर्वी चम्पारण जिल्ला मोतिहारी थाना रक्सौल-१४ बस्ने ओम कुमार रौनियार रहेका छन् ।
वडा प्रहरी कार्यालय विर्ताबाट खटिएको प्रहरी टोलीले बिआर ०५ क्यू ४३८४ नम्बरको सुपर स्पलेण्डर मोटरसाइकल रोकेर जाँच गरेको थियो । सोही क्रममा मोटरसाइकलमा सवार उनको साथबाट स्रोत नखुलेको ६ लाख रूपैँया फेला पारेको पर्सा प्रहरीका डिएसपी किशोर लम्सालले बताए ।
उनका अनुसार प्रहरीले मोटरसाइकलको बाँयापट्टीको लेगार्डमा गोल्ड प्रिमियम जीरा राईस लेखिएको प्लाष्टिकको बोरामा लुकाइछिपाई राखिएको अवस्थामा उक्त रकम बरामद भएको हो ।
प्रहरीले ५०० दरका नोट एक हजार २०० थान गरी जम्मा ६ लाख रूपैँया फेला पारेको डिएसपी लम्सालले जनाए ।
पक्राउ परेकामाथि हुण्डी सम्बन्धी कारोबार गर्न नहुने कसूरमा मुद्दा दर्ता गरी आवश्यक अनुसन्धान भइरहेको प्रहरीले जानकारी दिएको छ ।
