वीरगन्ज । संघीय मामिला तथा सामान्य प्रशासन मन्त्रालय सिंहदरबारले पर्साको बहुदरमाई नगरपालिकामा प्रशासनिक व्यवस्थापन सुदृढ बनाउन वरिष्ठ कर्मचारी अजय प्रसाद श्रीवास्तवलाई जिम्मेवारी प्रदान गरेको छ।
स्थानीय तह सञ्चालन ऐन, २०७४ को दफा ५७ को उपदफा (७) अनुसार प्रमुख प्रशासकीय अधिकृतको अभावमा श्रीवास्तवलाई नगरपालिकामा खटाइएको मन्त्रालयद्वारा जारी पत्रमा उल्लेख छ। श्रीवास्तव नेपाल स्वास्थ्य सेवा, हेल्थ इन्स्पेक्सन समूहमा कार्यरत अधिकृत तहका कर्मचारी हुन्।
उनलाई बहुदरमाई नगरपालिकाको आर्थिक तथा प्रशासनिक कार्य सञ्चालन गर्ने जिम्मेवारी तोकिएको छ। यसबाट स्थानीय प्रशासनिक कार्य सञ्चालनमा सहजता आउने अपेक्षा गरिएको छ । स्थानीय स्रोतहरूका अनुसार, यो कदमले बहुदरमाई नगरपालिकाको सेवा प्रवाहमा सुधार ल्याउने अपेक्षा गरिएको छ।
नगरवासीहरूले प्रभावकारी प्रशासनिक सेवा पाउने विश्वास व्यक्त गरेका छन्।
