सिरहा । लागू औषधसहित सिरहाबाट ६ जना पक्राउ परेका छन् । विशेष सूचनाको आधारमा जिल्ला प्रहरी कार्यालय सिरहा तथा मातहतका टोलीले उनीहरुलाई पक्राउ गरेको हो ।
प्रहरीले सखुवान्नकारकट्टी–३ बाट लहान नगरपालिका–२१ बेतहा टोल बस्ने श्रवण कुमार गुप्तालाई लागु औषधसहित नियन्त्रणमा लिएको छ । उनले लगाएको पाइन्टको खल्तिबाट डाइजोजाम ५ एम्पुल, प्रोमीथोजाइन हाइड्रोक्लोराइड ५ एम्पुल र बुरुफोफाइन ५ एम्पुल गरी १५ एम्पुल लागू औषध फेला पारेको हो ।
यसैगरी सखुवान्नकारकट्टी–५ महेश्वरी चोकस्थितबाट लहान–५ बलुवा टोला निवासी २३ वर्षका रोहित सदायलाई पक्राउ गरेको प्रहरीले जनाएको छ । उनको साथबाट प्रहरीले डाइजोपाम ९ एम्पुल, बुरुफोपाइन ११ एम्पुल र प्रोमीथोजाइन हाइड्रोक्लोराइड ५ एम्पुल गरी २५ एम्पुल बरामद गरेको छ ।
यस्तै धनगढीमाई नगरपालिका वडा नम्बर १४ सर्रे खोलाबाट प्रहरीले भारी परिमाणको गाँजासहित चार जनालाई पक्राउ गर्यो । प्रहरीले उदयपुर कटारी–८ अहारे बस्ने मधुलाल थापा, निर बहादुर गुरुङ, नविन राना मगर, र सिरहाको धनगढीमाई–१४ बस्ने शेर बहादुर मगरलाई पक्राउ गरेको हो ।
उनीहरुको साथबाट ५९ किलो ९६० ग्राम गाँजा फेला पारेको प्रहरीको भनाइ छ । पक्राउ परेकाहरुमाथि आवश्यक कानूनी प्रक्रिया अघि बढाइएको जिल्ला प्रहरी कार्यालय सिरहाले जानकारी दिएको छ ।
