पर्सा । पर्सा प्रहरीले सिंगयाही खोलाबाट अवैध रुपले उत्खनन् गरेको आरोपमा दुइटा ट्याक्टरसहित चालकलाई पक्राउ गरेको छ ।
प्रहरीले पर्सागढी नगरपालिका वडा नम्बर २ स्थित सिंगयाही खोलाबाट अवैध तरिकाले बालुवा, गिट्टी उत्खनन् गरेको आरोपमा ट्याक्टरसहित चालकलाई पक्राउ गरेको हो ।
पक्राउ पर्नेहरुमा पर्सागढी–३ औराही बस्ने २५ वर्षका सरोज साह र सोही नगरपालिकाको वडा नम्बर २ बगवाना बस्ने २४ वर्षका सन्दीप पटेल छन् ।
उनीहरुलाई इलाका प्रहरी कार्यालय पटेर्वासुगौलीबाट प्रहरी हवल्दारको कमाण्डमा खटिएको गस्ती टोलीले पक्राउ गरेको हो । खोलाबाट खोलाजन्य पदार्थ उत्खनन् गरी बगवानातर्फ जाँदै गरेको अवस्थामा उनीहरुलाई पक्राउ गरिएको पटेर्वासुगौलीका इन्स्पेक्टर प्रकाश थापाले बताए ।
प्रहरीले ना ५ त ३१२८ र प्र २–०३–००१ त १६८९ नम्बरको बालुवा लोड रहेको ट्याक्टरसमेत नियन्त्रणमा लिएको उनले बताए ।
ट्याक्टरलाई आवश्यक कारबाहीका लागि अस्थायी प्रहरी पोष्ट मनवा पर्सामा पठाइएको प्रहरीले जानकारी दिएको छ ।
