वीरगन्ज । भारी परिमाणमा लागू औषधसहित बाराका दुइ जना पक्राउ परेका छन् । प्रहरीले चलाएको जाँच अभियानका क्रममा उनीहरुलाई प्रहरीले मकवानपुरबाट पक्राउ गरेको हो ।
प्रहरी चौकी रातोमाटेबाट खटिएको टोलीले हेटौँडा १५ बाट पक्राउ गरेको जनाएको छ । वीरगन्जबाट हेटौँडातर्फ जाँदै गरेको ना ७ ख ८४१४ नम्बरको यात्रुवाहक बसमा प्रहरीले जाँच गरेको थियो । सोही क्रममा बसमा सवार दुइ जनाको साथबाट लागू औषध बरामद गरेको मकवानपुरका डिएसपी श्यामु अर्यालले बताए ।
उनका अनुसार पक्राउ पर्नेहरुमा बाराको कोल्हवी नगरपालिका वडा नम्बर १ निवासी सियाराम राम र सोही नगरपालिकाको वडा नम्बर ५ बस्ने अमित चौधरी छन् । उनीहरुको साथबाट डाइजेपाम १९८ एम्पुल, फेनारगन १९८ एम्पुल र नुरफिन १९८ एम्पुल गरी जम्मा ५९४ एम्पूल लागू औषध बरामद भएको प्रहरीको भनाइ छ ।
पक्राउ परेकाहरुलाई लागू औषधसम्बन्धी मुद्दामा मकवानपुर जिल्ला अदालतबाट १० दिनको म्याद थप गरी आवश्यक अनुसन्धान भइरहेको प्रहरीले जानकारी दिएको छ ।
