वीरगन्ज । कीर्तिपुर मैदानमा एक जना युवकमाथि भएको कुटपिट घटनामा दुई जना पक्राउ परेका छन् ।
जनकपुर बोल्ट्स र सुदूरपश्चिम रोयल्सबिच नेपाल प्रिमियर लिग क्रिकेटको फाइनल खेल सकिएपछि युवकलाई कुटपिट गर्ने दुई जनालाई प्रहरीले पक्राउ गरेको हो ।
शनिवार त्रिभुवन विश्वविद्यालयको गेट नजिकै एउटा समूहले सर्लाहीको बलरा घर भएका अमनकुमार सिंहमाथि आक्रमण भएको थियो । आक्रमणबाट उनको दुवै हात तथा शरिरको विभिन्न भागमा चोट लागेको छ ।
कुटपिटमा संलग्न दुई जनालाई पक्राउ गरिएको जिल्ला प्रहरी परिसर काठमाडौँका एक जना अधिकृतले बताए । पक्राउ पर्नेमा अशोक साउद र गणेश साउद रहेका प्रहरीले जनाएको छ ।
जनकपुर बोल्ट्सका समर्थक अमन कुमारमाथि नश्लिय साम्प्रदायिक दुर्व्यवहार गरेको आरोप छ । घटनाबारे प्रहरी वृत्त कीर्तिपुरले अनुसन्धान गरिरहेको छ ।
